Leser Manfred Boni aus Schwäbisch Gmünd fügt eine weitere Lektionen in Reimform hinzu.
Stuttgart - An dieser Stelle haben wir bereits diverse schwäbische Lektionen in Reimform veröffentlicht. Leser Manfred Boni aus Schwäbisch Gmünd fügt eine weitere Version hinzu:
Manchmol tue ganz schlecht haira,
kriege oina auf’d Gosch nuff, tue blaira.
Mit drei Johr bisch no a Kend,
wenn’d lüaga tuascht, des isch a Send.
Mit meim Bua do tue buabla,
ond sag: en dr Nas do dorfst net gruabla.
Mei Frau macht en dr Küche Flädla,
ond jonge Fraua des send Mädla.
A guats Essa send Lensa mit Spätzle,
wenn des mei Frau kocht isch’s mei Schätzle.
Maultascha und Buabaspitzla,
bevore lach, do muaßt’ me kitzla.
Tuast’s Gschirr richtig spüala,
tusch’t beim Essa au net trüala.
A Oi des koche manchmol woich,
ond uff da Acker kommt dr Soich.
Em Garta tuast noch de Zwetschga gucka,
isst oine, tuast da Stoi naus spucka.
Vom Baum ra hole Pflauma,
ond han verstaucht mein Dauma.
Äpfel pressa des isch moschta,
wenn’d ebbes kaufscht, no dorfst necht’s koschta.
En de Brombeer kasch’de stecha,
wenn’d zahla muascht, no muascht blecha.
A kloiner Teich des isch a Gompa,
rauchst a Zigarr, rauchst an Stompa.
Bada-Württaberg isch onser Ländle,
zom’a grada Geburtstag kriegscht a Ständle.
A Kartaspiel des isch Binokel,
a Hahn des isch a schöner Goggel.
Zom Fußball spiela sait ma au kicka,
ond henige Strempf die tuat ’ma flicka.
Tuast beim Wandra recht weit laufa,
muascht manchmol nastanda ond verschnaufa.
A Woizabier des tuat ’ma trenka,
vielleicht hängst nei drbei dein Zinka.
Brötla hoißet bei ons Wecka,
ond viele Büsch des send Hecka.
Streita des isch bei ons händla,
ond mit ’ma Mädle tuascht abändla.
A Fliege isch bei ons a Mugg,
ond a Tüte isch a Gugg.
Sechzig Minuta isch a Stond,
a Dackel isch a kloiner Hond.
A Schwein des isch be ons a Sau,
bischt recht bsoffa, no bischt blau.
Isch em Sommer richtig hoiß,
lauft dr na a Menge Schwoiß.
A narreter des isch a Narr,
ond Hochwürda isch a Pfarr.
Über d’ Politik könnst manchmol motza,
denn manche Sacha send zom Kotza.
So des war’s, was i wollt saga,
i hoff, von dr Zeitong kriege koine Klaga.
I hör jetzt auf, woiß necht’s me,
ond sag, Auf Wiedersehe ond Ade.
Unser schwäbischer Spruch des Tages: „Alt ond grau därfsch werda, aber net frech!“
Schreiben Sie uns: Zentralredaktion, Postfach 10 44 52, 70039 Stuttgart, Stichwort: Schwäbisch, Fax: 07 11 / 72 05 - 73 09; E-Mail: land@stn.zgs.de